Manifiestu de la Collaona (Asturianu)

IZQUIERDA XUNIDA por una Cordillera sostenible en una Asturies con futuro.

FRENTE NORTE contra la Conexión de Alta Tensión que un día se llamo Lada-Velilla

12/02/10 MANIFIESTU de LA COLLAONA

Los representantes elixíos d’Izquierda Xunida, alcaldes y conceyales de losconceyos de la fastera central del Cordal, axuntaos en La Collaona, xuntos y decomún, quieren esparder la so posición no que cinca a un problema que nun puesiguir apodreciendo ensin afitar una postura clara dende Asturies.

De magar que:

• La costa y la cordalera son unos finxos clave na nuestra tierra, que representen muncho del so valir y de la nuesa idiosincrasia.
• El Cordal Cantábricu ye una unidá en tolos aspectos.
• La enerxía llétrico ye un elementu esencial pa la sociedá.
• El diseñu de la rede llétrica ye cada vegada más problemáticu, no social y no ambiental, quiciabes porque enxamás nun se fizo por analizar fondamente la so problemática, nin s’afitó una política enerxética afayaíza, integrada en tolos demás valires.
• · La conexón d’alta tensión Asturies-Castiella espeya dafechu esa situación y amuesa un engañu a los nuesos pueblos y territorios dende cuantayá.

Analizada la situación, proclamamos:

1. La conexón d’alta tensión Asturies-Castiella nun ta acordies cola llegalidá na so tramitación, como afitaremos nel so momentu. Con too y con ello, ensin cuntar colos argumentos complementarios de los nuesos paisanos lleoneses.
2. La conexón d’alta tensión Asturies-Castiella supón un braeru dañu ambiental pal nuesu Cordal y los montes de les Cuenques, que yá tienen pagao abondo pol bien de toos.
3. La conexón d’alta tensión Asturies-Castiella ye un perxuiciu y una amenaza pa les actividaes tradicionales y pa les nueves que son respetuoses pa col monte y la vida nél, esto ye, una amenaza pal desarrollu sostenible qu’esporpolla yá en dellos sitios.
4. La conexón d’alta tensión Asturies-Castiella esfarrapa munchos años d’inversiones y estratexes de los conceyos (y de toa Asturies), enfotaos nun desendolcu turísticu acordies colos valires ambientales.
5. La conexón d’alta tensión Asturies-Castiella nun ta xustificada de nenguna de les maneres, como amuesa’l que lleve 25 años siendo ”urxente y necesaria”. Ello quier dicir que lleven 25 años engañándomos.
6. La conexón d’alta tensión Asturies-Castiella ye una fastera d’un debate democráticu qu’entá nunca nun se fizo.

Ye por tolo anterior polo que güei, nesti monte de nueso y de tolos que van venir dempués de nós, glayamos al alta la lleva

a) Que refugamos les opciones plantegaes por R.E.E. nel trámite iguao, que tenemos por illegal y nulu.

b) Alvertimos de la nuesa oposición al avance de la conexón, porque ye un ataque direutu al territoriu de nós, al Cordal, un patrimoniu de tolos asturianos y asturianes.

c) Al mesmo tiempu desiximos la retirada y reconsideración de la conexón p’abrir un alderique ensin engaños, democráticu y razonable, qu’algame’l beneficiu de toos o de la mayoría de la xente, respetando los valires superiores del común.

d) Desiximos como parte d’esi debate la xustificación real de les necesidaes enerxétiques y de la meyor manera d’atendeles, con seriedá ya imaxinación, ensin repetir les mentires del pasáu y d’agora mesmo.

e) Y, penriba de too, cualesquier tramitación futura (si ye necesaria) tien de ser peresquisita no ambiental y no social.

Nel Altu La Collaona, ún de los puertos del país de nueso, a 12 de febreru de 2010.

CASU Elías Rodríguez Lozano

AYER Alfredo González Arango

L.L.E NA Inés Prada Fernández

MIERES Luis Álvarez Payo

TEVERGA Luciano Zapico Fernández

Manifiesto de la Collona en pdf